Şahdağ: bölgədən xəbərlər
Qubada tarixi “Eh yolu” yaşadılır
6 dekabr 2023-cü il. Quba rayonunda Qrızdəhnə və Qrız kəndlərini birləşdirən tarixi yol canlandırılıb. “Eh yolu” eroziyaya uğradığına görə yürüş üçün əlverişsiz hala düşmüşdü. Bu ilin avqust ayında “Transqafqaz Cığırı” komandası ilk könüllü düşərgəsinə ev sahibliyi edib. Onlar burada bərpa işləri həyata keçiriblər. Artıq həm səyahətçilər, həm də kənd camaatı bu marşrutdan faydalana bilərlər.
Şahdağ Milli Parkında açıq qapı günü
8 dekabr 2023-cü il. Şahdağ Milli Parkının 17 illiyi münasibəti ilə 8 dekabr tarixində Quba, Qusar, Şamaxı, Qəbələ, Oğuzda açıq qapı günü baş tutub. İsmayıllı bölməsində isə əyləncəli tədbir təşkil olunub.
P.S. Şahdağ Milli Parkı 8 dekabr 2006-cı ildə yaradılmışdır. Milli Park Quba, Qusar, İsmayıllı, Qəbələ, Oğuz və Şamaxı rayonlarını əhatə edir.
Şahdağ Milli Parkının yaradılmasının məqsədi ərazi üçün xarakterik olan fauna və flora növlərinin qorunması, artırılması və zənginləşdirilməsi, elmi-tədqiqat işlərinin aparılması, turizm və rekreasiya üçün şərait yaradılması, əhalinin ekoloji maarifləndirilməsi, zədələnmiş təbiətin, tarix-mədəniyyət komplekslərinin və obyektlərinin bərpa edilməsidir. Şahdağ Milli Parkında 271 növ onurğalı heyvan qorunur ki, onların 108 növü Azərbaycanın Qırmızı Kitabına daxil edilmişdir. Onlardan vaşaq, köpgər, turac, berkut, çöl qartalı növlərini qeyd etmək olar. Burada Şərq palıdı, Qafqaz vələsi, Şərq fıstığı, göyrüş, qaraçöhrə və digər bitkilər mövcuddur. Şahdağ Milli Parkının ərazisi əvvəllər 15 hektara yaxın idi. 2010-cu ildə Milli Parkın ərazisi genişləndirilərək 130 hektara çatdırılmışdır.
Quba “İdman paytaxtı” seçilib
8 dekabr 2023-cü il. 2024-cü il üçün idman paytaxtının seçilməsi məsələsi müzakirə edilib. Gənclər və İdman Nazirliyinin növbəti kollegiya iclası keçirilib. Səsvermə nəticəsində Quba 2024-cü ilin “İdman paytaxtı” seçilib.
Sonra dövlət qurumlarının əməkdaşları arasında gələn il keçiriləcək idman yarışlarının planı da müzakirə edilərək qəbul olunub.
İsmayıllı: Fərid Qayıbov sakinlərlə görüşüb
9 dekabr 2023-cü il. Gənclər və idman naziri Fərid Qayıbov İsmayıllı və Ağsu rayonlarında yaşayan vətəndaşları qəbul edib. Tədbir dekabrın 9-da Ağsu şəhər Heydər Əliyev Mərkəzində baş tutub. Burada vətəndaşlar dinlənilib, onların müraciətlərini həll etmək üçün müvafiq tapşırıqlar verilib.
“Şahdağ Qusar” 6 qolla qalib olub
11 dekabr 2023-cü il. “Şahdağ Qusar” futbol üzrə II Liqanın növbəti turunda qələbə çalıb. XIV turda “Şahdağ Qusar”ın rəqibi “Kürmük Qax” komandası olub. Matç “Qax OİK” stadionunda Qusar komandasının xeyrinə, 6:1 hesabı ilə başa çatıb.