7 may 2024-cü il

Birinci Qarabağ müharibəsində itkin düşmüş hesab olunan və şəxsiyyəti müəyyənləşdirilən şəhid Elşad Şirin oğlu Qayımovla Xaçmaz rayonunun Hacıqurbanoba kəndində keçirilən vida mərasimindən sonra o, Şahdağ xalqlarından olan qrızlıların yaşadığı Hacıqurbanoba kəndində torpağa tapşırılıb. Dəfn mərasimində şəhidin doğmaları, Xaçmaz Rayon İcra Hakimiyyətinin vəzifəli şəxsləri, rayon hüquq-mühafizə orqanlarının əməkdaşları, hərbçilər və ictimaiyyət nümayəndələri iştirak ediblər.

Birinci Qarabağ müharibəsində itkin düşdüyü ehtimal edilən Elşad Qayımov Beyləqan rayonunun Şəfəq qəsəbəsində yerləşən “Peyğəmbərlik” qəbiristanlığında naməlum şəhid kimi basdırılmışdı.

"Bizim media"dan özəl faktlar: Beyləqanda sümükləri tapılan Birinci Qarabağ şəhidi Elşad Şirin oğlu Qayımovun mərhum valideynləri özləri bilmədən şəhid oğullarının məzarını ziyarət ediblər. 
Belə ki, Şirin və Xədicə Qayımovlar 1994-cü ildə Beyləqanda naməlum əsgər adı ilə dəfn olunan şəhidin məzarını ziyarət ediblər və onlar bilməyib ki, qəbri önünə gəldikləri oğulları Elşadın məzarıdır. 
Həmin vaxt Elşad Qayımov naməlum kimi yenicə dəfn edilibmiş. Bu sirrin üstü isə dövlət səviyyəsində aparılan intensiv axtarış tədbirləri nəticəsində aşkar edilən naməlum hərbçilərin sümüklərinin DNT analizindən sonra bu günlərdə açılıb. 
Birinci Qarabağ Müharibəsi şəhidi Elşad Qayımovla bağlı daha bir təsirli fakt isə onun sümük qalıqlarının anası Xədicənin 40 mərasimi günü-mayın 4-də müəyyənləşməsidir. 

Bu özəl açıqlamanı Bizim.Media-ya Xaçmaz rayon İcra hakimiyyətinin Vətən Müharibəsi və şəhid ailələri ilə işin təşkili şöbəsinin müdiri Vüqar Fərzəliyev açıqlayıb.
Şəhid Elşad Qayımovun qardaşı Rövşən Qayımov qardaşının sümük qalıqlarının 30 ildən sonra tapılmasına sevindiklərini deyib. Qeyd edib ki, ata-anası Elşaddan nigaran həyatdan köçüblər, indi onların da ruhu şad olar.